入正題，要比較奧數利弊，首先我哋對奧數嘅理解要係同一樣嘢先。
I. 以前的奧數班與現在的奧數班
以前奧數係無得補習的，一係就學校有培訓就培訓，一係就只有你參加完比賽入倒圍先有額外培訓。現在補習班多到係人都話自己係奧數，連小二都話有奧數都唔知係咩玩法。
最大問題來了，奧數補習班以利益為首，為咗多人報，點吸引人? 家長離不開係諗有無用、每次學倒幾多條同埋自己個囝/囡明唔明。咁咪降低題目難度滿足大家要求，咁樣就實有用、做得多同埋好易明，結果係好多人都係學得唔全面，而且為淺而淺，一啲要花多啲時間思考、培訓倒推理邏輯能力嘅題目就唔做。
所以大部分人現在所謂學過奧數，其實係無學過。
II. 奧數 = 鬥快，唔使steps，寫答案?
其實小學奧數尤其是算式題目，多數都可以背題型。我試過問番啲同學仔你明唔明點解架，佢唔明，轉少少題型仲有機會唔識。佢哋只側重答案對錯，唔理過程。
如果係面對小型比賽臨急抱佛腳呢種心態都仲可以理解，但對於長遠學習完全係會令你倒退。
但係中學奧數都係短答就得架啦? 對，有好多比賽都仲係只需答案唔使steps，但難啲嘅比賽係你無得背題目，亦都唔會撞倒個答案，一定要係好有邏輯逐步逐步諗先會答對。但我見倒嘅所謂奧數班，其實好多時仲喺小六程度停滯不前。
況且，再難啲嘅比賽，係要寫步驟、做證明。簡言，正常題目要分a – e part引導你做，奧數刪除a – d，要你直接做e。所以如果認真學奧數，係無可能唔識寫steps，只求答案，不求什解。
III. 奧數的得著
i. 學常規數得著
我記得小六我就學緊啲3 + 9 + 15 +…+ 99呀，5 + 25 + 125 + 625 + … + 390625 呀呢啲ASGS嘅題目，如果係明背後點解嘅，直情而家中六DSE 都唔使背公式。 (ASGS 係DSE長題目被公認為最難果課咁滯) 中一就學證明開方2係寫唔成分數，以前係Pure Maths 先教；仲有中二三有大把圖形證明題，尤其是圓形，人哋DSE可能諗5 – 10分鐘都諗唔倒，你就咁睇就知答案。MC更加唔使講，無可能唔夠時間，夠check 3、4次卷，用唔同方法check到個答案啱為止，次次都滿分。
ii. 學歷、職業的得著
小學跟我一齊係香港代表隊的15人當中，會考兩個係10A，幾個8A，好多都係醫生呀，投資銀行家呀，精算師咁，有啲師兄弟姐妹仲係外國做博士研究、FB工程師之類。(我都只不過係小薯仔一個~~哈哈)
有啲大公司見工問題真係會考下你奧數啦，3點半時針同分針相差幾多度呀。有間超大型投資銀行試過問: 我呢team traders 全部都係印度計數top 0.01%快嘅人，你憑咩我會請你? 我心諗，我一定會答因為我仲快過佢哋 XDD
當然唔係每個人都學到咁top，但至少思維能力一定會比其他人更有條理同埋做嘢會更有程序。
總結
1. 要學奧數，跟啲正統啲嘅 2. 認真學就唔好怕付出多少少時間去思考 3. 切忌不求什解背答案
唔係認真學，就不如唔好學，否則到時候淨係學咗唔寫steps，考試之前唔溫書，好有自信但唔識又當自己識呢啲弊病就真係弄巧反拙。(認真，真係有人學奧數什至係奧數港隊出到去又考D又考4，到時得不償失)