首先你要知道21點係莊家派自己一隻牌而且係打開嘅, 你自己就有兩隻. A可以當1或11, 公仔牌就當10.其他數字牌就當番牌上數字計.你先做決定,可以加牌,停牌直至你滿意. (保持遊戲簡單,唔講其他options)如果你的牌加埋大過21 就輸, 未到21就到莊家玩. 莊家嘅規則係加埋未夠17就硬性要繼續加牌. 最後如果你同莊家都唔超過21點就鬥加埋邊個大.
講到呢度好多人可能見倒要加數都卻步.我只好奉勸你唔用計數機試計4+9+7,如果連進位都唔識,閣下嘅腦已經退化,一個小六學生兩秒答倒你.
講番正題,話說有個麻省理工大學(MIT)數學系教授有日去賭場玩廿一點, 睇睇下發覺點解有時個莊攞十二點(加多隻公仔就爆),好似攞多幾次咭都唔爆;但有時又無事(<~~實在太似廢話).佢重新審視全個遊戲有無咩缺口位,發覺你可以決定加唔加牌但莊家無得選擇係其中一個優勢例如你揸住14點其實就唔算好得去邊, 但如果莊係5點, 佢好易直落加兩隻10自爆. 咁你就可以按兵不動,俾莊家一個自爆機會. 所以佢用電腦設計咗一個basic strategy嘅列表,係講明你幾多點,莊又幾多點,你就應該加/停牌.繼續佢就睇下幾時莊會易爆啲,幾時無咁易.俾佢諗倒原來當時賭場係用完一副牌先重新洗牌,即是你可以透過記憶出現過嘅牌推測仲有咩牌未出,而直覺話佢知只要淨番好多大牌未派,佢嘅勝率就會大啲.原理其實又係要個莊爆.不過教授就的確係教授,我哋就淨係識斷估無痛苦,佢就番去入落部電腦度,試下如果正常情況就正常落注,如果勝率大就加重注碼,結果run 咗幾百萬鋪牌, 發覺係會贏的.呢個就係我之前提過所謂嘅Monte Carlo method.概率唔一定係要計, 只要測試夠多次,可以透過電腦實驗推測到一個同實況相差無幾嘅結果.佢仲整咗個好易記大牌細牌淨番幾多隻嘅方法.跟住就同學生組織咗一隊MIT professional Blackjack team去vegas幾日就炒起晒啲莊家,每間賭場都蒸發咗幾百幾千萬,賭場搞咗好耐都發現唔倒佢哋出千,淨係知輸得好金,將佢哋列晒入黑名單.當時只不過係6,70年代嘅事.事後佢寫咗本Beat the dealer嘅書紀錄呢件事,之後有人拍咗套叫21嘅電影添.呢個數學痴線佬之後覺得21點唔夠好玩,出多本叫Beat the market嘅書,無記錯的話係研究binary option呢類投資衍生工具,佢話投資市場仲易玩咁喎XD
講就講咗21點必勝,不過要付諸實行其實不易. 例如你可能要預咗一坐落去就打好多鋪,體力精神要好足夠;要記熟basic strategy一步不能錯;數牌數得啱同時要記實個數,稍一心神不在個荷官派牌收牌太快可能就功虧一簣;遇到贏面大落大注但輸咗要深明呢個係variance,係正常嘅而唔影響心理狀態...我建議叫人戒賭不妨先話佢聽你贏硬架,不過以你能力可能慘過番工咁咋. 另外其實澳門安裝咗continuous shuffling machine,即係佢每玩完一鋪就會洗牌, 所以要記牌就超難啦~~(我唔會話你聽我大學果時去美國交流去旅行果時係去過vegas賺咗啲旅費架~~XD)
Commentaires