Search

做個「剛剛好」的穩定數學5** (技巧篇)


DSE Maths 5** 3

所謂技巧,今日先講計數機。


首先你要明白你可以用嘅所有工具! 我當然唔係叫你擦膠當骰仔用,擲A就填A啦。最重要當然係計數機,但間尺圓規量角器都唔係無用。我知道有啲人係正義嘅化身,覺得學數學最緊要正宗呀,唔可以用旁門左道呀之類。其實我又覺得係要正宗嘅,不過我會分開學習數學同考試數學,更什者要分埋研究數學**。(<--有興趣自己睇到最後啦) 總之,個考試有得用計數機唔係去心算呀嘛?雖然心算倒係好型,但考試唔係鬥型嘛。(當然,前題係假設人腦喺計DSE題目係慢過計數機,但我諗呢個假設應該大部分人都適用嘅)嗱,我講嘅嘢連考評局評卷果個都係咁講架,佢第一年DSE就話啲考生唔識用技巧做MC,所以出來成績唔理想。其實暗地裡佢都係想叫你醒啲,唔好死牛一面頸。


入正題,計數機用法: 1. 內置嘢 2. Programme 3. 自創嘢


內置咗cos formula, heron’s formula, quadratic formula. 一定就要用啦。至於仲有無其他嘢可以玩? complex number ……仲有好多,自己攞本說明書發掘下啦 XDD

Programme 可以玩就仲多,基本上要你用下腦點樣嘅Programme 係最實用同泛用。對於我嚟講,programme 第1類最好係一條多用,舉個例子,two equations two unknowns,variation 果課搵k1k2有用、兩條線搵相交點有用、就咁出two equations two unknowns 有用,我果陣會考係差唔多第一年有有得入programme 嘅計數機都已經入咗佢。


第2類要入嘅係長到呀媽都唔認得嘅公式,如果你次次用緊嘅公式都係 P = a^2 rt(b) /log (1/c) *d/(1-d^2),仲要功課30條都係用佢,我都想搵人同我搞掂佢啦,一個合法嘅途徑就係入咗佢當programme,咁就快好多,至於係邊啲?你搵你阿媽去確認一下就知,佢一望倒就彈開果啲就一定要入。


第3類係常出嘅麻煩題型,MC 第40幾條果啲呢,出晒名難同煩,就算你識晒都會阻你5分鐘果啲。有啲人唔知就繼續自己做,大佬呀,唔怪之得你又話自己連撞嘅時間都無啦,後面仲有幾條數你仲撞個頭埋去。之前會考我都無叫學生入,因為唔係咁出,但呢幾年年年都出,真係怕咗佢,哪怕佢只係出一條MC都入咗佢,唔講你聽邊條啦,去片自己睇啦,(賣下廣告先***警告***以下programme較適用於2016年或以前的題目,現在MC陸續將花巧programme變得用唔著)

第4類係一啲內容out of syllabus 但有實際用途嘅programme,我講咗啦,考試用得就要用架啦,無所不用其極。我要澄清,教我係唔會教out-c 嘢,因為唔會考,不過如果果個方法係有助你計倒條題目,我唔介意幫你入落programme去用。當然唔係叫你寫out-c steps 落paper 1搏(其實係博)命,我係叫你用落MC啫,無人知嘛。不過呢類型嘅programme 就無可奉告啦,補習班見XP

自創嘢其實都係補習私伙嘢,點樣用計數機幫你做拆括號?點樣可以做重覆嘢,loop 來又loop去嘅式?都係果句,希望下堂補習見倒你啦 hahaha


最後加多句,programme 好睇個人用法,有啲係必入、有啲係睇自己style,唔好補習老師叫你入就入,有時有啲嘢佢為咗show off 俾你睇就叫你入,但實際上係無用,自己要分析~~(對唔住,我係清泉,我唔會叫學生做無謂嘢,我會過唔倒自己果關XDXD)


**學習數學係想你學四則運算、培訓邏輯思考、程序,對一啲已有題目認識同了解;考試數學係……見字思義,對一啲有規律嘅題目攞高分(而我哋就係呢方面嘅專家);研究數學基本分pure math 同applied math,pure math 係對數學本身再作深入創新嘅證明,而applied math 係將pure math啲理論嘢喺實際生活做modelling,好難講例子你聽,不過最近一個我聽聞嘅係google 做searching 其實係運用緊一種叫residual integration 嘅物體,唔知關唔關微積分裡面嘅積分(integration)事呢?!唉,不過都係果句,處於香港呢個科學智慧貧乏嘅地方,同學、家長們除咗識將數學同街市呀嬸鬥快心算買菜之外就覺得一無事處,但弊在計數機嘅出現,令到班中學生連1* (-1)、1*9之類都唔識計,45除5就等於4,到頭來真係連街市呀嬸都勁過你,直得深思XDD

1,453 views0 comments