我面對嘅學生太多被現在嘅考試制度框框限制咗自己嘅思維，加上老師跟學生好似要做一啲無謂比拼: 你識計呢條，咁我又出深啲，深到全部人都唔識做，結果導致一來大部分學生學唔倒嘢；二來考試又失去分析學生學習進度嘅意義，個個對數學失晒興趣同埋話數學無用。
我講過，考試數學、純數學、應用數學係三碼子嘅事。如果淨係睇住考試問你嘅嘢，就話實際應用唔倒，所以數學無用，絕對係犯咗直線邏輯嘅謬誤。數學通常係一種工具，若果你非要看到佢應用層面不可，佢通常係會同其他範籌一起應用，例如搭上Computer Science 可以發展到AI 、Big Data 呢啲大名；配上Finance可以為期權、債券、人壽保險等定價；Natural Science就不用多提；就算唔係咁專業，細到好似摺紙手工Origami，都可以應用到數學嘅differential equation (後來呢個技術應用到太空科技上用來將太陽能板摺細)
今日係講下新興嘅比特幣(Bitcoin) 之類嘅奇怪嘢。
喺貨幣經濟學上嚟講，一種貨幣之所以能通用大概都係因為佢信得過，而信得過大概都真係有舊實物喺背後頂住，例如好耐以前美國實行過金本位制度就係美國有舊金幫手，貨幣同金有相應對等價值，咁就有人信啦。咁當然現代有更多玩法，例如香港聯繫匯率港元同美元綁死喺7.75~7.85兌1嘅比例，啲人信美元就等如信港元，亦有啲方法係綁一籃子貨幣，亦有其他做法。
咁啲人點解信得過比特幣呢啲電子嘢呢?不敢太班門弄斧，用BB入門理解就係佢有個加密系統記錄低人與人之間交易紀錄，基本上人手係唔可以自己刪改紀錄，否則個系統係會發現唔啱數的。亦即是話用得比特幣嘅人信就係信個加密系統，呢個系統係有如金一樣咁值錢。咁加密系統係點做架，講到加密學(Cryptography)就當然關數學嘅Number Theory事啦。Number Theory 嘅基礎就可以係簡單如 3x + 2y = 1，揾晒所有整數(x, y)嘅答案啦。
所以再話咩equation 無用呀，數學淨係加減乘除街市買菜有用呀之類，其實係因為你嘅生活圈子同埋認知俾個街市框死咗，而你由細至大又真係俾人洗咗腦，個思維永遠逗留喺分數、小數、百分數四則運算，果啲係小學topics嚟架，係時候進化啦!!!
Comments