做個「剛剛好」的穩定數學5** [最重要環節~~!!臨場訓練(二)]

除咗機械式答題，臨場其實仲要訓練穩定性。

穩定性基本要求係要多做mock卷。所謂做mock 卷，我個人對學生嘅要求係比較嚴格，DSE開始時間係8:30a.m.，第一份係2小時15分鐘、第二份係1小時15分鐘就跟到足。好多同學其實喺學校都有做mock 卷，但可能只係做一份卷什至只係其中一部分，咁樣係反映唔倒你實戰嘅時候嘅狀態，我成日都同同學仔講，你想高分，你先要處理咗你考完第一份卷用咗2小時15分鐘你個腦，你仲頂得住之後果1小時15分鐘再繼續用你個腦。數學同其他科唔同，你係要用腦的~~

俾個個人經歷嘅例子你，果陣時Alevel，我考之前一年求神拜佛科econ唔好同pure maths連住考，因為前幾年都有前科，點知佢就係擺埋一齊考。咁其實真係一出時間表果刻我已經安排緊到時點調整自己精神狀態。到考果時就先考econ上下晝各三個小時啦、之後果日再考pure maths上下晝各三個小時。我考到pure maths paper 2 個半鐘倒，真係攰到就嚟訓著(不過我唔會話你知我只係淨番一條LQ同埋計過條數就算成條空咗都一定攞A)。你如果係慣咗溫書做數一個鐘就溫第二科嘅話，可能就要搵啲時間適應一次過做兩份卷啦。

作為一個補習老師，點樣可以幫倒同學仔嘅穩定性呢?

呢方面我諗我比啲大型補習社更為痴線。我就唔會搞到去會展做mock 架啦，不過我就會同班同學仔一齊捱啦，最後關頭呢幾年我都係同同學仔做足8個mock，每次早起身8:30齊齊排排坐做卷。

其次8set卷我都係控制到20%新題型80%舊至到30%新題型70%舊呢個範圍，而最痴線係我真係一個月左右出8set，要知道砌一份卷要set到啱程度、公平、分倒高低，唔係好似有啲名校/名師咁出啲全部人都唔識嘅題目就ok，因為咁深根本係唔會出，亦都唔係就咁改編pastpaper 就得，因為每年DSE真係有新嘢，根本係要做多少少資料搜集同心思先可能set得好。MC卷要出到啲同學錯concept而搵倒嘅答案，而且ABCD每個options都平均分配，仲有正確答案擺去ABCD邊個位都係心理交戰，成件事其實真係難到想打人。(如果你知道set DSE數學卷果個人嘅人工同可能一份elective卷嘅人工比較你應該明我講咩，我仲要一個月做佢8倍12個月做嘅嘢，理應係佢96倍人工，不過我唔係咁計較嘅XDD)

跟住呢就係學生做卷時候收集一啲佢哋嘅個人數據同埋習慣，例如佢哋做唔同題型所需時間，遇到唔識/新題型思考幾耐時間，有無定期望錶之類。我覺得有啲細節位嘅提醒對於臨場考試有好大幫助。其實好多頂尖運動員都有一啲科學化嘅訓練臨場反應方法，例如NBA Stephen Curry 練同時拍兩個波，同埋起手速度，務求比賽時可以快過對手隻眼(正常人眼reaction time 0.2秒)；中國羽毛球國家隊直情要佢哋做MC預判對手殺球落點加強防守技術，慢過0.2秒答個答案，可能實戰就輸咗球波。當然我就無咁多資源搜集咁多數據，而且一份咁長時間嘅數學卷亦無需反應太快XDD。不過最起碼例如俾學生知道佢原來做某類題型嘅時候係相對慢嘅，可以睇番會唔會係慣性用嘅解題方法未係最直接；又例如有無某一題諗得太耐嘅情況，呢啲都係分數上唔可以直接反映倒嘅實況。

講咁多係我可以做倒嘅嘢，係因為學生本身都未必可以做卷時客觀分析番自己嘅表現。好多時都係攞住個分數去分析，唔係話自己唔小心，就係話份卷難唔夠時間做，咁唔具體嘅總結係無助提升自己嘅奪星機會架~