Search

做個「剛剛好」的穩定數學5** [最重要環節~~!!臨場訓練(一)]

每年補習我最緊張就係班準備出去考公開試嘅學生,因為公開考試比學校考試嘅變化多,同埋要注意嘅細節都多,但又要一次定生死喎。數學科比其他科更不同之處,係數學科雖然長年都有翻炒題目,但近年DSE每年總有一兩條係全新嘅題目,你係搵晒所有pastpaper 什至好多教科書都係未見過的,你係要臨場用腦應對的,而新題目嘅分數係足以令你攞唔倒5**,所以臨場考試嘅訓練我會比其他補習老師做得更多更仔細,基本上無人會好似我咁做XDD



DSE數學5**

由基礎講起,今日先講機械式答題。


每年section A 有好多題目都係倒模式題目,要提升速度同埋準確度,必須訓練出一套機械式嘅答題方法,意思即係呢次考你你係咁答,下次問番差唔多嘅嘢,你都唔會改變寫法。例如 a^(-3) b/a^(-4),你可以a^4 b / a^3 咁計,又可以直接 a^[(-3)-(-4)] b 咁計,我希望你二擇其一,唔好一時用方法一、一時用方法二。咁樣嘅好處係你會省卻思考嘅時間同埋寫嘅模式早已預備好,係會少啲機會錯,而同時間你會慳埋你嘅腦力,腦係用來諗難嘅題目的(另外一個好處就係喺選擇方法嘅過程中已經比較出少啲steps 同埋簡單啲嘅方法)。又例如,幾何圖形證明題,steps 其實都係果啲,但有啲同學就係會忽視佢哋話好簡單啫,到臨場考試先來諗點寫steps,浪費時間。


咁多年教學生,最後攞A攞5**嘅,好多個做我第一份mock 都喺section A俾我扣十分,包括單位、步驟、無攞3 sigfig,所以你話未試過實戰幾次全份卷而輕視section A,你分分鐘出到去一考就已經無咗十分,跌一個grade 算好彩,跌兩個grades 係應該。所以上堂時我比較討厭學生無寫steps 唔補番,仲話考試嘅時候自然會寫番,我會強迫佢哋寫番(而因為咁,佢哋會比較討厭我XDD),因為好多個學生到頭來考試就會自然寫唔番,錯番一樣嘅嘢。


舉多個親身經歷你聽,唔關DSE事嘅。HKMO係喺香港嘅數學比賽之中唔算難嘅一個,每年初賽都十幾廿個滿分。正常唔係點理,我哋比賽開頭幾名果幾個都會滿分。但我係唔鐘意忽視細節,同埋喜歡熟習咗遊戲玩法先去上場嘅人,所以就算啲題目好簡單我都會操練一下速度同埋歸納下啲做法。點知我哋果年一考,難過以前好多同埋多咗中伏位,我都係做完剛剛對咗一次題目仲要改咗兩次就完卷。平時同我差唔多level嘅都係啱得一半,最後全港都係得我一個滿分。就咁一個example 話你知,你唔訓練一下,更簡單嘅都可以令你跌grades,相反,你做多咗呢少少工夫,平時可能勁到90幾分嘅人都可以滑鐵爐考得差過你。

65 views0 comments