做個「剛剛好」的穩定數學5** (內容篇)

根據上年(2015)非官方紀錄，要數學考倒5**要around 93%嘅分數。即是卷一可扣11分，MC要滿分；又或者MC錯9條，卷一滿分。內容方面基本上要全部都識，cher 呢啲鬼唔知咩。咁我就講啲可能你唔知嘅嘢。

再講多次，遊戲規則係會影響人嘅行為(係，我Alevel 係有讀Econ嘅)。而家遊戲規則係考評局出卷，唔係你老師亦都唔係你本數學書個出版社，所以如果你大膽少少，可以掟走你本教科書同埋challenge 一下你老師教你嘅嘢係關唔關DSE事。事實上好多教科書係做得唔好架，例如好多level one 嘅問題係根本唔會出現喺DSE；考評指引話叫佢「提及」果個topic，佢就全部咩都擺晒落本書度，根本唔會考或者唔係咁考；仲有啲topics係根本只會出喺MC唔會出喺長題目，但佢次次就淨係寫啲長到呀媽都唔認得嘅steps 出來。而老師教學內容方面就因人而異啦，但以我所知，為數不少都淨係對住書去教，所以都未必好。喺呢度提埋你，就算有啲補習老師出埋啲所謂好勁嘅題目，都可以唔理住，因為好多時係為難而難，係宣傳手法，DSE都唔係咁出。

咁樣呢個又唔跟，果個又唔跟，跟咩去溫習好? 有兩樣，第一，你驚果樣嘢係out-c (out of syllabus)，你可以去睇考評指引check番究竟果條數考唔考得。第二，就係不斷重複又重複咁做pastpaper。事實上每一年pastpaper，卷一 A(1) 係有90%相似，A(2) 係有70%相似，B就好多時唔同、大概40%相似啦。MC 相似度更高。所以溫書內容次序方面應先做好By topics 嘅pastpaper，等你A(1)、A(2)啲分好穩先，同時間搵出邊啲topics係會喺DSE考，喺邊份卷考，邊啲唔會考。

至於section B，就真係麻煩啲，一般老師或者補習老師都未有能力去到而家個出卷水準。首先，你要知道section B 唔係特登考你超難技巧，唔會要你無中生有，好多時可以由上文下理得知一啲解題資訊。第二，年年出題，尤其是最後一題，都係唔同，但係可以話係有跡可尋，可能係一啲以前additional maths, pure maths, applied maths 或者 maths & stats 改篇而成嘅題目，當然maths & stats 佔嘅會比較多，呢個係334制度下Core 數學編寫課程指引有提及嘅。其實好多老師出卷會違反以上兩個原則，出下啲你唔會諗倒嘅奧數級題目；一係就自己本身未讀過pure maths, applied maths, maths & stats 什至additional maths，所以只係跟會考果套，又或者抄番以前啲section B 題目，只可以話係做完都無用。咁又係啦，咁跟咩讀好呀？第一，想慳時間嘅去搵個識晒以上咁多科嘅補習老師而且有晒果幾科pastpaper 嘅 (例如我XDD)。第二，自己去書局睇下有無啲咩mock 卷有啲你未見過嘅題目。記住，重點係train 你點樣喺臨場諗倒條題目，條題目係要有相關提示字眼先值得做。

總結: 1. 點都要做pastpaper 先，其他嘢包括書練習、workbook、ex唔好理住。 2. section B 都事關重大，可以揀個好嘅補習老師專出section B 教你睇題目字眼同埋train 你諗嘢方法。自己train 自己可以去書局搵下啲mock睇下有無新型少少，但有guide 住你做嘅題型(其實都好少)。

講完點溫書，下次講技巧